當年憑歌唱比賽進身娛樂圈的阮兆祥(祥仔),早前宣布將於今年「回歸樂壇」,除推出個人唱片外,更會於10月開演唱會。前日祥仔正日生日,在中環進行兩場「處男快閃busking」,先後獻唱了《K歌之王》、《心之科學》及《愛很簡單》等,吸引大批途人駐足觀賞及拍片,期間除了有人大叫「阮兆祥」外,更有不少小朋友聽到眼定定,表演後很多途人要求合照,親民的他有求必應,任影唔嬲。
聲大夾惡
祥仔事後將現場精采片段「濃縮」並放上Facebook專頁,不過觀乎相關片段,卻發現當祥仔「轉戰」碼頭獻唱期間,突然殺出三名彪型大漢,尋找負責人之餘,並不斷聲大夾惡追問:「邊個畀你喺度唱歌呀?嘈住我呀知唔知呀?你話唱就唱呀?」當工作人員解釋有申請時,該數名大漢再謂:「同邊個申請呀?有無同我申請呀?」現場氣氛一度緊張,祥仔更一度嚇至唔識反應。
猶有餘悸
事後祥仔猶有餘悸說:「我本身已經好緊張,唔係好瞓到,因為係我一生人第一次busking。點知唱唱吓有幾個人衝埋嚟,仲要好有殺氣,又聲大大咁,初初我都有啲畀佢哋嚇親,後來先知原來係虛驚一場……」不過問到如何「虛驚一場」時,他卻大賣關子謂:「遲啲你哋就知架喇,留意我社交網,包你同我一樣咁『驚』喜。」 |