【本報記者報道】藝人張振朗、賴慰玲（Winki）和朱敏瀚（朱仔）主持的旅遊節目《約埋班Friend去旅行》，今晚（2日）繼續暢遊悉尼，3人出發到農場親親羊駝，自爆怕動物的Winki因猜輸包剪揼要摸一隻愛吐口水的羊駝，Winki被牠嚇到跌落地兼哭了出來。

之後3人體驗坐馬車，振朗閒談間自爆買了不少保健品，Winki即寸爆他勁虧：「暈機浪、暈船浪、又暈車浪，騎馬就暈馬浪！」節目尾聲，3人攤在草地上睇日落分享經歷過的最浪漫時刻，感性的Winki說：「我聽過最浪漫嘅說話，就係臨結婚前，個女仔同男仔講：『你仲係我男朋友。』男仔就講：『你係我一世嘅情人。』之後我就嫁咗畀佢喇！」

振朗則自爆試過一次過送兩紮花給女朋友，先送一紮女友不喜歡的花，再一紮女友喜愛的花，製造心理落差氹女友高興，惟不理解用意的Winki瘋狂劖亂歌柄，激到振朗發火，場面搞笑。

而昨晚一集亦十分爆笑，3人除了乘坐離地270米的高空纜車體驗「堅離地」，更走出纜車頂部欣賞美景。他們亦在吃飯期間來個深情對話，朱仔大嘆做藝人難以結識新朋友，靚仔有型的他被問到會否對同性有興趣時，竟九唔搭八自爆：「我拍《痞子2》時同咗周嘉洛打茄輪！」