蔡瀚億（BabyJohn）在《荷里活大老千》扮演演員「舒奇」，但經常發生搞笑事，之前他戲中戲跑龍套扮大俠，卻被人打到嘔泡；在片場蹓躂時，又不幸被女演員兩度誤為色狼，連星兩大巴，到前晚「舒奇」孖住「墨基」吳業坤（坤哥）這個沙煲兄弟收工回家，兩人為爭廁所沖涼更搞出一場肉搏大戰，令人爆笑。

被恥笑「冬菇仔」

該場戲講述蔡瀚億和吳業坤成身汗回家後，剝晒衫褲「全裸」爭廁所沖涼，互相死攬箝住對方，混亂中蔡瀚億捉住坤哥隻腳唔放，坤哥又咬蔡瀚億隻手，男男肉騰騰拉扯，卻被王子涵見到，還恥笑二人「冬菇仔」。

爆汗成身濕核突

蔡瀚億與坤哥在內地片廠拍攝這場戲時，時值炎夏，氣溫接近40度，而片廠由鐵皮搭建，熱到抽筋，未埋位已經爆汗，所以黐立立埋身肉搏，真係會黐肉，感覺唔多好受，蔡瀚億提起都忍唔住笑：「其實呢場戲諗起都覺得核突，因為拍嘅時候天氣太熱，我同坤哥兩個熱到成身濕晒，啲汗係黐晒喺個背脊度，乾咗又熱番又再濕番，跟住攬埋一齊打交，希望觀眾睇完覺得好笑，因為真係拍得好辛苦。」