【掌握大局／蔣偉權】在麥菲文散倉後，現時香港只剩下廿一個馬房，以每個馬房養馬量六十匹計，如果全部馬房爆倉，香港便有千二匹馬，但當然，北上從化開倉的練者有多十個馬格，所以雖然大倉的名額搶手，另一方面，細倉亦不再細，因為有部分馬匹如果大倉不能接收，自然要落入中小型馬房手上。
就以鄭俊偉馬房為例，現時養馬量四十九匹，現時交出六場頭馬，可以話略為偏少，但未算不合理，以鄭廐的兵力，其實接近三分一係質新馬，包括「靈光八號」、「寶冠多」、「威武承傳」、「正時機」、「大道至正」、「向前看」、「大力」、「陽明螢螢」、「紅褲日」及「御風超影」等駒，上述馬匹出賽次數少，甚至未上過陣，到底係龍係蛇，真係要跑過至知，如果當中有兩至三匹係超班馬，成熟後殺上高班，鄭廐的達標希望當然好快成真，萬一就算上述馬匹無一成材，靠老馬打救的話，鄭廐亦未必會絕望。
事實上，鄭廐老馬藏龍臥虎，好似「樂滿家」、「公証揚鳴」、「金剛之星」、「玩到贏」、「嬴風雲」、「金剛仔」及「金碧科」等，均有一定戰鬥力，估計鄭廐今季達標並非不可能的任務。