梁朝偉怕與劉嘉玲做對手戲，因太熟，做戲感覺怪怪的

【本報記者報道】梁朝偉昨晚在太太兼經理人劉嘉玲陪同下，到中環出席銀行理財廣告片活動，廣告片製作團隊包括導演及攝影夏永康、服裝造型張叔平及美術指導文念中。偉仔表示，已多年沒拍香港廣告，今次的幕後班底合作多年，好有默契及信任。偉仔預告將會埋班拍電影，會演出兼監製，但肯定不會預太太的份兒，因怕跟太熟的人做對手戲。

偉仔自言不懂理財，「要交給專業人士處理，正如做戲就交給我」。他說，以前都會買「磚頭」(樓)，但現時樓市差，是否仍有入市？偉仔聞言反應甚大地反問：「依家你敢唔敢買呀！有冇賺睇吓報紙就知。」

樓市跌 偉仔反問：你敢唔敢買呀？

問及會否多拍香港廣告？偉仔表示要看緣分，像拍電影，有很多人找他演出，但都要他喜歡才可，要找到合適的劇本和角色很難，最好是自己搞製作，做到自己想做的事。

偉仔預告將會埋班拍電影，心目中有理想的班底，自己會演出兼監製，由於屬構思階段，題材和角色還未落實，希望下年可以成事。偉仔笑言，總之是好睇的戲種，偉仔說：「我入行已42年，成日等不是辦法，應主動一點，將自己多年來所睇的小說、文學或想做的角色等，搵一班人幫手創造出來。」他身兼兩職不怕辛苦，覺得是他演藝生涯是最後階段，不知有幾長，在這個階段做自己累積那麼多的經驗而想做的事情。

入行已42年  常等角色不是辦法

不過，偉仔埋班不會預埋老婆：「我唔係太想同自己好熟嘅人拍戲，感覺好怪呀，對方日日同你一齊，但你又喺度做戲。」他稱：「敵對都好似冇咩新鮮感喎！大家都幾十年啦！要新鮮感搵個新鮮啲嘅對手。」

偉仔早前與嘉玲重遊結婚地不丹，偉仔大讚這地方：「我覺得不丹同繁囂城市唔一樣，磁場好平靜，旅客少，結識好多新朋友，我覺得好舒服，嗰度係充滿好多回憶。」兩人亦與當年有份幫手安排婚禮的皇叔敍舊，偉仔又說剛在德國小鎮拍完電影，同樣寧靜非常喜歡，故打算下次到歐洲，會再重遊舊地放鬆。

自爆一個禮拜入戲院4日

嘉玲即將要入zone排舞台劇《香港式離婚》，偉仔亦要擔任東京國際電影節評審主席，各有各忙，他說：「可能7日要睇晒15套戲，我平時都好鍾意睇戲，一個禮拜都入戲院4日。不過電影有時好難比較，取捨好難，好在今年有四位評審，都好鍾意電影，大家有傾有講幾好吖。」

談及另一影帝張家輝相隔20年再重返電視圈，夥拍胡杏兒參演由前無綫班底蘇萬聰導演及歐冠英總編劇的刑偵劇。偉仔表示：「其實如果有好嘅計劃，不論電影又或者拍劇，我都冇所謂。最主要個計劃對我嚟講有冇興趣。變咗就冇話特別分拍電影又或者劇咁。（無綫有冇搵過你返去幫手拍劇？）冇。（自己有冇諗過都想返去拍劇？）無端端我做咩要返去拍。（咁如果搵你返去拍你想唔想？）唔知呀，要睇情形。」

偉仔抗拒演舞台劇：「我好怕喺舞台赤裸裸，感覺唔自在，我個人性格唔習慣一個人喺舞台上畀大家望住。」