大家時時聽北海道三大名蟹，包括鱈場蟹、松葉蟹、毛蟹；而第四大蟹就係花咲蟹。佢個名其實係來自產地，即係北海道根室市花咲港，以嗰區捕獲數量最多，所以叫花咲蟹。
花咲蟹天然嘅蟹殼顏色呈漸變紫色，煮熟後變為好鮮艷赤紅。甲殼呈心形，好浪漫呢，不妨拍拖晚餐請女友食啊！
此蟹喺北海道係珍貴嘅蟹種，唔係常常食到嘅，舊時可能產量多D，普遍D，但近年資源減少，政府規定唔可以捉雌蟹、亦限制只可以捉幾多cm以上大嘅蟹。其實北海道蟹產量全面減少，唔單只花咲蟹，所以品種嘅價錢都不斷上升。
記得我小時候喺北海道，叔叔會就咁鹽水烚蟹食，如果捉到雌蟹，會做味噌蟹湯，因為蟹味濃，湯特別好飲。花咲蟹雌蟹特別多子，食時卜卜卜卜，口感有D似魚子、又甜又香，依家想起都好懷念，好想食。
其次會燒，炭火BBQ，因蟹已有海水味， 完全唔使多加調味。蟹腳可烚熟或鹽燒，蟹蓋膏及蟹身肉可以做釜飯，成為好有風味嘅有味飯。蟹真係全身都唔會浪費，就算蟹蓋都可以盛酒飲呢！花咲蟹蟹肉味好獨特，有D似龍蝦味，肉質結實，味道好唔同，依家係Season，不妨試下呢！
漁獲浜焼
地址：銅鑼灣軒尼詩道525號澳門逸園中心18樓
電話：2575 5677
[Kei San 小檔案]
日本北海道出生。居港超過三十年，能操流利廣東話，年輕時出國留學，畢業後走訪海外多國工作的關係，練就出獨立自「煮」的好手藝，對食材的選擇也有心得，因此被傳媒發掘，活躍於各大報章雜誌的烹飪示範及美食專題，更有幸參與不少電視節目演出及主持，是料理達人及美食家，日本飲食文化的傳道者。
圖說
1)睇下幾好肉，肉質比一般蟹實淨有咬口。
2)蟹膏、肉及蓋可煲有味飯，好濃蟹味。
3)花咲蟹殼好多釘刺，呈少少心形，大家睇到嗎？
4)蟹腳粗大有肉，燒最好味。
|
搜尋新聞
