本欄再次搵來光大新鴻基溫傑(Kenny)為大家分析個股,但係有別於以往,我地今次唔係叫佢自已選股,反而係想佢答下讀者問題。
事緣有戰友問到太陽能股的前景,Kenny聽到後表情有少少意外,三秒後佢話:「而家做財經節目,觀眾通常係問ATMX等的新經濟股,而傳統股就主要係問物管同汽車,真係一段時間無人講環保光伏等行業。」佢進一步解釋,於內地從事太陽能相關行事,政府補貼其實相當重要,但係由於部分可再生能源專案未被納入補貼目錄,而補貼亦有所延遲(根據Kenny母公司光大證券的資料,截至2019年延遲發放的累計補貼金額約3,000億元人民幣),降低行業再融資的能力和投資意願。加上電價附加總額不足,徵收亦困難,都令業績受壓,太陽能股自然普遍受到市場忽略。
聽到這裡,我行運社長估計Kenny應該係睇淡這個行業,結果令人跌眼鏡。Kenny表示:「雖然唔算非常睇好,因為股市升唔單單講基本因素,仲要得到市場認同。資金追入,股價先可以長升長有。但針對太陽能股,國家電網公司作為補貼兌付責任的主要機構之一,估計未來有機會發行資產抵押證券,解決補貼延遲發放的問題,對行業發展有利。
行業之中,Kenny近期正研究協鑫新能源(00451),集團是內地最大的民營光伏發電企業。去年收入60.52億元人民幣,按年增長7%;淨利潤為2.95億元人民幣,按年減少37%。盈利受壓的其中一個原因,是受累融資成本上升27%。根據管理層所指,降負債及輕資產化是首要目標。集團去年完成4項資產出售交易協定,並為已出售光伏電站專案提供維修等服務,以產生穩定的收入來源,保障現金流。今年初集團與華能集團簽訂了首批股權交易合同,加速推進電站出售,進一步緩解資金壓力。Kenny預期:「若存量資產補貼拖欠得以解決,協鑫的現金流將顯著改善,電站資產的價值亦有望得到重估,股價上升可期。」
|