左起：Wyman大晒與祖兒（左）及何韻詩的三人合

祖兒表示病足一個月，認真慘情。

祖兒在活動中講嘢都要陰聲細氣。

祖兒透露6月中閉關，為8月的演唱會作準備。

左起：Wyman大晒與祖兒（左）及何韻詩的三人合

祖兒表示病足一個月，認真慘情。

天后容祖兒昨日出席活動時無離聲氣，原來她病足一個月，自生病後開始嘗試放輕聲線來說話，並表示可能犯太歲，媽媽前日已幫她攝太歲，希望即攝即好！<文>娛樂部<攝影>梁迺枬

容祖兒昨日到尖沙咀出席活動，早前因病致聲音沙啞的她，昨日在活動中講嘢都要陰聲細氣，並透露正在康復中，但進展緩慢，祖兒說：「已經病咗足足一個月，咩方法都試過，媽咪每日畀蜜糖我飲，林二汶又私人醒梅精我試，近排都中西合璧，又食西藥又做針灸。」她又表示可能犯太歲，媽媽前日已幫她攝太歲，希望即攝即好！她已用盡方法，希望盡快康復迎接8月的演唱會，她說：「閉關會喺6月中，但其實依家都盡量想休息，所以都閉閉哋㗎啦。」

東廊揸車險遇意外

祖兒又表示，現時因病取消了錄音盡量養聲，自生病後開始嘗試放輕聲線來說話，又指原來以前一直用錯方法，她說：「依家講嘢都細聲咗、溫柔咗，有啲唔慣，平時慣咗大聲，依家要叫人哋行埋啲講嘢，要學阿Lam（林子祥）咁養聲，要一世養聲，以前慣講嘢大聲其實好傷聲帶，亦透支自己身體，不過朋友就會以為我係咪唔開心或者唔舒服，因為聽我把聲一來細聲，二來完全無感情，點樣細聲得嚟又有感情，真係好難學。」
祖兒又表示最近凡事都要小心，路面亦多了不少危險駕駛者，自己要更專注，她又透露試過在東區走廊揸車，想切線突然發現有車，即刻扭番入去，朋友指她成架車離了地，之後都要戒駕駛時說話。

Wyman晒合照找數

此外，黃偉文（Wyman）日前舉行50歲生日派對，邀請大批圈中好友出席，其中祖兒與何韻詩更是繼去年10月共同現身東京後再次同場，Wyman前日晒出一張三人合照，還大爆：「自從2012年元旦之後便欠下大家的『一年一度一月一日叱咤三人合照』。」原來Wyman今次找數。