[桐言桐語/B女]近日天氣反覆無常，身邊嘅好友同屋企人都病咗，希望佢哋快啲好返啦。話說有一日瞓醒覺，一行岀廳發現屋企隻貓唔見咗，嚇咗我一跳，因為佢平時都會留喺自己張貓床，然後我周圍搵佢，最後發現佢瞓咗喺我媽咪張床，用張被遮住自己，天氣凍咗，大家都要著多件衫啊！

今日先睇第九場三班1600米，我就鍾意匹「包裝才子」，呢匹北半球馬經過上季初嘅適應之後，上季尾已經一再輸近，上仗佢喺不利後追嘅情況下追入一席第四，另外，再睇返佢上季入Q嗰一仗，佢要讓今場對手「健快聯盟」9磅，但今場佢反而受讓3磅，而且，今次潘頓選擇騎佢而放棄咗佢嘅嫡系馬匹「健快聯盟」，相信「包裝才子」今場贏馬開齋嘅機會都幾大。

再睇返第二場五班1400米，我就揀咗匹「勇晉大師」做心水，今仗場事係佢轉倉之後初出，其間都睇到工夫積極，試左兩課大閘走勢亦都唔錯，最吸引我嘅原因係佢埋門嗰一課加眼罩落草地彈閘，走過步闊有力，呢匹五班馬做夠工夫，亦睇得到狀態大勇，絕對有權喺到轉倉即取勝。