【任勝之言／黑豹】一年一度國際騎師錦標賽又到了，每年呢日筆者都相當期待，因為可能欣賞到各地好手在此作賽，每年都有不少難忘場面，今年戴圖理重臨令筆者不期然想當年初接觸賽馬時一批高手名字，告東尼、靳能、狄克文等這批殿堂級高手，時光流逝但畫面依舊在筆者心中。
第二場「話晒事」落到五班絕對是大超班，近績好及配好手，之前幾次筆者都無下注此駒，原因是此馬體重不足千磅，近幾次都要負頂磅上陣，對此馬十分吃力，今場終於體重回升一千大關，如能克服劣檔，機會極濃。
「葵涌老友」上季用潘頓一擊即中後只近而無威脅及弱配，今場再用上潘頓似有意攻堅，講評分確實有利，前駒大患。「醉開心」剛賽上名，正路是熱門之選，但馬房今季成績暫強差人意，只可拖腳。「利之喜」剛賽略長，今次合路程小心回馬槍。