[桐言桐語/B女]幾日前同幾位朋友食飯，大家都對馬匹各持己見，整個飯局都好愉快，唔知大家又知唔知點解馬匹會有馬印？原來係當佢哋痕嗰陣就會用牆黎摩擦止痕，亦因為呢個原因出現咗馬印。講返起呢個飯局相當特別，因為會知道好多以前嘅趣事，由於我資歷尚淺，所以呢個飯局等於上咗一堂課。

今日先睇第二場五班1650米，我就揀咗匹「真跑得」做心水，呢匹馬今季跑過四次，四次嘅成績都唔太理想，不過今仗落班就跑返谷草，而且係贏馬路程，再睇返佢上季紀錄，佢跑谷草成績係好過跑田草，所以我對佢都有信心，再加上佢今仗抽到靚檔，只要跟到前都唔係冇機會。

到第五場四班1650米，我就鍾意匹「夢幻戰士」，上仗跑同程就拎第四，其實都跑得唔錯，雖然輸咗比「新界之星」、「鑽飾神聖」同「永益善」，但今仗就少咗「新界之星」做對手，而且再睇佢上仗岀閘明顯唔快，另外騎師方面，今次巧合抽到贏馬拍檔田泰安呢個組合，只要發揮理想，期待會再次贏馬。