第四場四班1200米，四駒初出，又有兩駒只跑過一場，年紀稍大那三駒近績未見佳處，這場四班賽大有混戰之感。

艮志騰雲三甲穩陣

「艮志騰雲」初出跑第四，前中段拍住頭馬「八十八十」享受慢步速，雖則臨尾腳仔軟，大半程二叠望空，可以頂到最後二、三十米始冇P，初出表現及格有餘，假如是賽步速形勢相近，因應對手實力下降，諒可爭一席。

第五場三班1200米，或許「精益求精」賠率將會一面倒，因為同場太多馬匹冇資格擔飛，不排除出現熱頭冷腳賽果。「開心神駒」近績差到無倫，前仗跑包尾，上場十二駒跑第十一，一睇近績唔開胃，不過近兩場確有藉口原諒，勿看得太認真。以牠去季77分能夠在三班此程贏馬，而是賽位好且是傷出第二回，若跑得出應有水準，隨時歸位。