「及時行樂」狀態隨著多跑已重返軌道，是賽再跑相同

【洪禮賢講馬】明晚跑馬地九場C+3欄賽事，各項大彩池都冇多寶；莫雷拉處於停賽期，或多或少對其他騎師帶來「方便」，有部分「雷馬」過戶他人，至於他們有冇著落？視乎發揮及際遇吧。
如果冇記錯，有時雷神停賽，並不表示死敵潘頓大殺四方，反而無影無蹤唔係冇發生過，因此，「冇雷揀潘」策略是否合理，見仁見智，個人情願枉作小人，寧向其他騎師打主意。
第四場第四班1650米，「多多」上季經已相當「出名」，走規猶如醉酒佬，跑到頭搖又尾擺，前一場復出跑谷草短途，末段衝刺之際都會突然頭揈揈、馬身打側，一直改善不大。
然而上場「多多」轉戰此程，並無快步速之助，居然沿路跑得規矩，末段以直線從後衝上，表現前所未見，留下深刻印象。要是今場表現能夠持續，而取位比上場高明，可爭前列。
第五場第四班1650米，「及時行樂」上賽明顯受惠步速及中段變奏，賽事水準高極有個譜，可是本身表現比起之前三場好得多，看來其狀態隨著多跑下，漸已重返軌道，是賽再跑相同路程，排中檔易搵生位，形勢好跑，可視為半冷馬膽。