昨晚的兄弟姊妹團有王君馨、李亞男、伍詠薇(伍姑娘)、岑麗香(香香)、簡慕華、潘曉彤、梁嘉琪、倪晨曦及蔡一智等。香香、亞男及君馨齊齊受訪,她們透露婚宴上有分享環節,歡迎Christine(苟芸慧)加入「人妻黨」。
香香好怕講到哭
懷孕七個月的亞男笑言已第10次做姊妹,做完今次可以退休:「BB第一次做花女,影相時都感覺到佢郁,佢好有表演欲。(會分享御夫術?)之前我同王祖藍見過婚姻輔導,就介紹咗畀佢哋,佢哋好努力上堂,仲勤力過我同祖藍。」
香香自言成為人妻只有短時間,有少許可以分享,怕講到哭。問到會否教Christine掌管財政?君馨覺得對方不太懂管錢,而且有很多興趣,應該教對方儲錢。談到「處女黨」獨欠鍾嘉欣,眾姊妹表示已傳片段及照片,稍後或會開facetime直擊,香香更指她們拍照時有留位給嘉欣。
伍詠薇不用頂酒
伍姑娘孖蔡一智受訪,蔡一智指他們會令氣氛更開心,但他不會上台發言,祝福新人快點生小朋友,男女也可。而伍姑娘就指新郎在加拿大做了很多功夫,這天輪到兄弟姊妹團,她又直言不用頂酒,自己會飲:「不過聽講一對新人好飲得,到夜晚啲賓客可能瞓晒喺度。我會上台分享,同Amazing Esther、六壯士,仲有其他朋友。」 <文>娛樂部<攝影>梁迺枬