【大鐵論馬／大鐵】國際賽預賽過後，一地花生，馬王「美麗傳承」再度敗陣，意味着一哩賽正式改朝換代。過氣明星馬「巴基之星」再度掀起話題，出閘冇耐又自動收停，似乎應是最後一次見到此馬上陣。曾是灰色神獸的「平湖之星」再次不肯入閘，如有相同情況，應會被強制退役。「忠心勇士」3歲之齡輕鬆攻下二級賽，新一代短途新星正式誕生，正本戲相信會取代馬王成為國際賽焦點。尾場沈拿策騎「與龍共舞」時，當中的跑法引起競賽小組關注而且展開研訊，結論如何擇日再定，不過網上已有不少馬迷熱烈討論。花生食完，焦點又落在星期三晚的谷草賽事上。

上星期賽事取消，令到大批馬匹爭相再報名，尤其是兩場四班1200米拆組賽事，差不多有五十隻馬報名，當中包括不少上周無法出賽的馬匹，其中一隻「紅褲日」在第二場上陣，上次取消賽事錯有錯著，由本來的大外檔變成抽到內檔，預計形勢會變有利好多，馬兒今季表現穩定，上仗本身想用雷神補中但可惜當日場地不利放頭，最後小敗不到一個馬位，當日其他場次放頭馬大部分再出都有表現，相信今次在拆組賽事應可以賺取級數。「同盟力量」終於重返贏馬路程，騎練合作今季偶有佳作早前試閘也不差，可以兼顧。「君子精神」擅長唞唞埋埋搏一鋪，現時評分已減過贏馬時，季內初出冷門可敲。「醉翁意」上次增程失敗，跑返短途又有機會接近。最後要埋「好友益」，雖然馬兒有缺課，但是本身在四班級數不俗，賽前試閘有走勢，今次有個一檔幫手用埋徒弟仔或可偷襲。