惠英紅一身時尚造型現身米蘭。

惠英紅與班尼狄甘巴貝治合照。

惠英紅一身時尚造型現身米蘭。

惠英紅與班尼狄甘巴貝治合照。

【本報記者報道】影后惠英紅（紅姐）獲時尚品牌邀請參加2024春夏米蘭時裝週，原來這是紅姐首次踏足米蘭且參與時裝週，來到這個時裝之都，紅姐坦言要大出血：「米蘭我未嚟過，我覺得係一個好有味道嘅城市。今次時裝週我係睇Prada嘅騷，佢啲衫好靚！同埋我覺得好適合我著，所以我決定會買好多件！因為真係好靚！」

紅姐表示期間發生不少趣事，例如跟團隊外出吃飯時，她「得個睇字」：「今次係寓工作於娛樂，我哋有出去瘋狂購物、瘋狂食嘢，應該係話我睇住佢哋食嘢，因為我今次要著一啲之前已經fitting（試身）好嘅衫，所以我唔敢食太多，驚肥。」

在時裝騷上，紅姐與不少影星互相集郵，如憑泰國BL劇《因為我們天生一對》爆紅的Win、於漫威系列電影中飾演「奇異博士」的英國著名男星班尼狄甘巴貝治（Benedict Cumberbatch）等。

難忘事亦不少，最開心撞見不少老友，「最難忘係喺呢度我見到好多我嘅『honey』呀，見到一啲我好想見到、又有啲好耐冇見嘅朋友，譬如杜鵑，我已經一年冇見到佢，今次見到佢我好開心，都幾想念呢個好朋友。」

紅姐今次亦乘機跟大家分享著衫貼士，她表示自己對時裝有要求，重點是人著衫而非衫著人，「每個人都有自己性格，同埋視乎自己嘅身形，我唔會勉強自己去著一啲而家好潮嘅衫。著衫最重要將自己缺點掩蓋，將優點曝露出嚟。我缺點就係我唔太高，我就會搵啲衫著到自己好高，同埋我唔係太女性化，咁我就會著一啲比較偏少少帶中性，或者強悍一啲女強人嘅款式。」