【本報記者報道】歌手張敬軒（軒仔）前日（26日）獲邀出席由 IAB Hong Kong 主辦全港最大型的人工智能（AI）的營銷會議「 IABHK C23」（C23），活動探討AI對數碼營銷領域的變革性影響。去年獲跨社交平台總結成為最Top KOL（最強意見領袖）的軒仔，於會談中分享AI對娛樂行業、音樂、藝術等創意工業的影響。
軒仔坦言這十年中最大的恆常收入並非來自音樂，而是透過social media（社交媒體）層面。而過去一年於YouTube見到很多「AI尹光」、「AI張敬軒」等不同的AI藝人，都是一些好嘗試，但同時自己亦存在矛盾，甚至偏向有點擔憂。「作為網民、消費者、用家嘅角度，AI嘅存在一定令到我哋嘅生活各方面嘅層面好方便；另一方面作為從業者、版權持有人，我哋見到嘅係一啲令我哋不安嘅未來。譬如當呢啲AI生成嘅sound bite（講話片段）喺internet viral（網絡散播）嘅時候，copyright（版權）問題點去解決呢？唔同範疇嘅版權，呢啲可能會顯伸一啲再大啲嘅議題。」
對於踏入AI時代，軒仔自言仍處於觀察者角度，抱著學習心態。雖然擔憂，但他不得不承認AI對於修復舊母帶有一定程度的貢獻。
AI修復黃家駒歌聲無得彈
軒仔說：「譬如我接手Avon呢間錄音室時，有471餅母帶由於年代久遠而冇辦法修復。其中一餅係Beyond喺麥花臣球場一個從來未公開過嘅錄音。磁帶有啲溶化，就算通過焗爐，夾硬拉番開兩個磁帶，佢個磁粉都係食咗喺上一層，但有咗AI之後，由於佢有數據推算嘅模式，可以推算番家駒把聲，做到一個數碼修補。呢個修補方法令到我哋可以聽到一啲我哋從來未聽到過嘅錄音，或者一啲已經受損咗嘅錄音，對於我哋備份嚟講絕對有好處。不過始終文物嘅本身、嗰個錄音帶本身所存在嘅歷史價值，亦都係佢稀有嘅原因。所以呢個係兩個層面嘅考量，但我覺得喺修復過程入面絕對有可能做得到。」
隨後，軒仔與主辦準備了一小段由「AI張敬軒」演繹的《Amazing Grace》於座談會上播放，軒仔表示自己聽完後都十分驚訝。播放完後，台下觀眾報以掌聲，軒仔笑說代「AI張敬軒」多謝大家的掌聲。他謂雖然AI張敬軒聲線酷似自己，但他的震音並非如此，更即席獻唱《Amazing Grace》的第一句，台下觀眾頓時起哄呼歡及拍掌。
軒仔表示：「所以喺音樂範疇，如果純粹以網友角度，大家如果好鍾意聽到尹光唱林家謙、林家謙唱尹光、張敬軒唱邊個邊個，係滿足網友一種情感投射，僅此而已。」
自爆跟Tyson Yoshi叫AI作詞
他又自爆跟歌手Tyson Yoshi嘗試叫ChatGPT（AI程式）填詞，但效果並不理想，會出現邏輯上問題，但他認為將來可能解決到，但暫時以創作人角度，業內未有太擔心。「廣東話係九音，係一個相當之複雜嘅語言體系，第二樣係廣東話中文入面都有一啲詞彙運用，首先如果真係有AI去做呢啲嘢，佢要識得分析，啊，呢隻歌想口語化啲，譬如有首歌《你唔愛我啦》，呢啲口語啲嘅，或者係《你不愛我了》，首先AI個data base（數據庫）要識得分辨呢啲先。」
最後問到對AI的發展潛力，軒仔認為人類所發明所有的科技，應該是要延續人類的文明，而並非摧毀。「所以我哋喺運用AI或科技嘅時候，我覺得我哋盡量保持番自己作為一個人類正常閱讀時間，每日一杯咖啡睇一本書，或者一本書裡面嘅一段，增長自己知識，培養自己要跳出框框，之後先會有更好嘅AI，咁我哋嘅文明先至唔會被我哋自己所發明嘅嘢摧毀，呢個係我自己嘅諗法。」
|
搜尋新聞
