第五場二班1000米，「翩翩」點好法，其實都唔使多講，望望佢出道以來賽績，六戰獲3冠3亞，從未甩過頭兩名，可以準成咁，質素高兼鬥心強，應該係今場鋼膽。

「喜益善」上次鍊贏兩匹強手，唔係容易辦到，贏完加得嗰1磅再跑，筍到不得了！「傑飛」自從12月跑完，隔咗一年零兩個月再跑，進度唔多清楚，但係隔晚票數唔係冷，小心爆出嚟。「勝利寶石」上次一有接近走勢，雷神即刻擸嚟跑，實搏。「鑽石巨匠」速高檔好，唔敢睇小。

第六場四班1200米，「勁皇子」季內跑三場，每一場騎師都唔同，呢次輪到史卓豐，老實講，本身陣上唔係有咩悅目走勢，只係多次在此程輸唔遠，但係蔡廐新馬跑幾場都冇料到，確係幾少見，如果呢場都唔得，唔會再理佢。「越跑越好」此程好手，只忌磅重。「巴基小子」淋地跑得特別開心，今晚如果有雨，隨時贏埋。「澤心星」及「金飯碗」一放一追，宜兼顧。