左起：吳肇軒及劉嘉玲接受主播許文軒訪問，大談拍攝

藝人劉嘉玲及吳肇軒日前作客TVB娛樂新聞台節目《StarTalk》，接受主播許文軒專訪，大談首度合作拍攝新戲感受。

劉嘉玲大讚拍檔吳肇軒是可造之材：「佢與生俱來有一種憂鬱，需要人去保護，去照顧佢，好似年輕版嘅梁朝偉。佢會準備好晒先去拍攝現埸，佢會同我、導演及攝影去傾，我覺得佢有做導演嘅天分，我諗番我做新人嗰時，係TVB嗰七年好傻，完全唔知發生咩事，只係密密做，不過就練到其他嘢返嚟。」肇軒說：「依家我個腦Function唔到，其實導演有同我講，叫我唔好阻住嘉玲姐啲時間，所以我事前係有啲緊張，惟有再加倍作好準備。」

乜都試玩一餐

專訪中提到青春有限，劉嘉玲說：「我一早已經知我唔係少奶奶命，但我好享受工作，梁朝偉都成日問我做乜我咁好精力，佢係唔能夠同時做好多嘢嘅人，依家佢可能做一樣嘢都覺得好攰，但我做緊一樣嘢嘅時候，個腦又會諗另外一樣嘢，但我都會有攰嘅時候，會做運動去調節。」她又說：「以前會覺得自己大把青春，大把機會去嘥、去做夢，但依家見到時間有限，所以仲有體力就乜都試，玩Snowboard同跳Skydive，Why Not？」