汰弱留強係殘酷現實，有得留低嘅固然代表佢哋有過人之處，被out嗰批又係咪代表完全唔入流，練馬功夫難登大雅之堂呢？可能係，但未必全部都係，曾經風光過，點都有兩三吓散手。

名牌效應不愁兵力

基於名牌效應，好多馬主慕名想愛駒入到幾個強勢馬房，就算要跟隊，寧願等吓，都唔想擺喺二三線馬房，久而久之，下游馬房失去「吸馬」能力，來來去去得一批舊人支持，唔會有幾多「新人」加入，高價優質馬更加諗都唔使諗，試問點可以發圍噃。

上季來路貨麥菲文贏得十四場，一季貨仔變咗水貨， 某程度上，咪就係歸邊囉！如果新季未能發力，重新打造一個鮮明形象，贏番三、四十場，怕且在港練馬生涯唔慌有起色。