現年41歲的陳展鵬，昨日宣布與28歲的女友單文柔（Phoebe）結婚，展鵬不但向傳媒發放婚照，還發表聲明：「各位親愛的傳媒朋友、各位好友，多謝大家一直對我的支持和包容。今日，好高興同大家宣布，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福。」

谷胸上陣浪漫溫馨

原來兩人已於歐洲影婚紗相，相中兩人笑得相當甜蜜。穿着谷胸婚紗的單文柔性感迷人，一對新人在教堂前拍照，十分煙韌，展鵬還緊緊攬着未婚妻，一副冧樣，另外又在英國巴士前拍照，非常浪漫。

展鵬接受big big channel訪問，問到何時決定結婚？他笑言：「其實喺心入面計劃咗好耐，但可能性格問題，我覺得可以承諾、時間啱先會講。」

十月簽字盡量低調

至於在哪裏求婚？他說：「香港，我哋去英國亦有啲原因，佢成日都覺得我未必夠膽喺街頭度求婚，而佢好鍾意英國同埋喺嗰度讀書，我希望留住呢一刻回憶，喺英國影婚紗相亦有好多小插曲，好多嘢都係去到當地再買，今次影相亦好刺激，除咗可以同大家分享，拍嘅時候亦驚畀人影到，有一張畀人放上網，成件事就會穿咗！」

展鵬又多謝公司無綫批假給兩人，他們會於十月正式簽字結婚，想盡量低調，儀式會做足，食飯只是雙方家長，不會請太多朋友、擺好多圍。至於幾時生BB？他則表示隨時ready，但講緣分及上天安排，現在先搞好婚禮為重。