【掌握大局／蔣偉權】跑完三個賽日之後，可以初步做個小總結，田泰安的拼勁及鬥志，在雷神走後實力得到釋放，而潘頓打回本來面目，演出較為飄忽，在潘頓坐騎經常被熱捧的情況之下，兩者選其一，當然係田泰安比較可取。
第三場三班1650米，「招多福」連續兩季首戰在此程配田泰安勝出四班同程，今季難度略為調高，首戰在三班跑此程，要知道，此駒上季中曾經在田草1600米勝出三班賽，班次必定可以應付，加上休出特佳及谷草性能一流，有力在此重溫美夢。
第五場四班1650米，「川河領駒」在港出賽兩季以來，僅於同程勝出一場，實力似乎見盡，只係在四班等機會之馬，惟此駒一再於谷草C欄跑得好，有可能係欄位特擅，是否真的如此，當然要跑過至知，但換另一個角度去睇，今仗對手亦都各有缺點，此駒體重逾千二磅，負頂磅問題應不大，過去兩次負頂磅大敗皆為馬季最後一戰，大有可能係因出現疲態而落敗，與負頂磅關係不大，今仗改配田泰安，可見真章矣。