編者按
警隊由近三萬名紀律人員，每人都是一口螺絲釘，缺一不可。警務處為推廣警務人員的「榮譽．使命．忠誠」的價值觀，內部首次推行「我的警察故事」大賽，讓人員透過分享自己的警察故事，重溫作為警隊成員的光榮感，並喚起人員對日常警務工作隱藏價值的共鳴。《成報》將選取部分優秀作品與讀者分享報案室的實況之實況。
優異獎作品：《報案室之日常》
得獎者：深水埗警區特別職務隊
在深水埗報案室工作是對我這個剛出警校的警察最大的挑戰，因為這裏號稱全港報案室中案件數量最多及類型最多樣化。然而，火爆、不滿、委屈、沒有一絲暢快感和滿足感，就是報案室人員每天的內心讀白。而最棘手的案件莫過於家庭糾紛。
「我有交稅㗎，你份糧係我出俾你㗎！要你哋做少少嘢都咁麻煩！」
「即刻！你老闆我無咁多時間等，轉個擔保都咁慢，你估我好想嚟差館對住你哋呀！」
「問咁多問題，有時間問，不如嗱嗱臨幫我去拉人啦！」
「排咩隊呀，我急呀，我先！你同我彈開啦！哎哎哎，唔好再郁手啦！呢度係差館，唔好打交！」
一如既往的喧鬧，這哪裏是凌晨三點的樣子?
吵如街市 助理值日官喝停叫囂
「做乜嘢？」助理值日官（ADO）聽見吵鬧聲越來越大，直接從座位站起來：「你哋當呢度係街市呀？全部同我收聲唔好再同我郁手郁腳，呢度係警署，要報案嘅唔該排隊，亦唔該你哋尊重我哋啲同事！」
總算安靜了下來，但就那麼幾秒之後……
「就係呢個人渣，我個女為咗佢自殺!我個女放棄所有嘢，連酒席都訂埋，未婚夫都唔要，都死過嚟跟住佢。」
「你話飛佢就飛佢，你係唔係人呀，你害到我個女依家為咗你自殺……」
報案的媽媽情緒越來越崩潰，又哭又閙，完全聽不進我說的話。突然，她跳起身，手顫抖着指向我：「登記！登記！登記有Q用咩！你哋班差佬仲唔去揾，快啲去揾啦！」
「你提供啲資料越詳細，我哋就越快揾度你個女。你個女條命依家掌握喺你手上。」ADO大聲喝止。
「阿軒，帶佢地過嚟，即刻通知Commander關Sir。電台！叫所有同事留意自己咇份嘅大廈天台，睇下有無可疑女子喺上面。」
500個天台 電台通知前線留意
「有！」（我心想……深水埗起碼有成五百個天台喎…）
ADO：「你哋喺邊度得知個女想自殺？啲相喺邊度嚟㗎？最後同個女聯絡嘅係邊個?幾耐之前？」
這對父母聽到ADO的交代，總算暫時安靜下來，兩人相互安慰着抹眼淚。ADO則盯着年輕的男生，要求他交代事情的始末，男生在ADO的壓力下才不情不願地開口。
原來女生已經向她的朋友們發了遺言，她的父母通過她朋友得知消息後，才找到這位男生，想要他勸回女兒，但男生態度相當不屑，執意要跟女生分手，只給她父母提供了女生發給他在天台割脈的照片，無奈的父母着急之下只能拉著他來了警署。
ADO：「請你先將你個女近照同佢喺天台嘅相提供比我哋先。」
男朋友：「阿Sir，如果無咩嘢，我諗我可以走了啦啩。」
「你害到我個女咁，我個女為咗你同未婚夫分手，依家你竟然想一走了之，完全唔理佢生死，你……」說着便拉扯了起來。
小隊指揮官關Sir：「喺未搵到事主，確定她安全之前，你必須留低協助我哋警方！」
借WhatsApp 冒男友氹失戀女現身
男朋友：「佢一直喺WhatsApp同我講要喺返埋一齊，係咁話我呃佢，不過阿Sir佢已經係我個Ex-Girlfriend啦，唔該。」ADO突然心生一計：「你介唔介意俾我哋用你個WhatsApp同你女友溝通？」男朋友：「可以，但係你哋唔可以代我應承同佢結婚囉。」
隨住一個又一個Message，你來我往，一班報案室同事，不論男女，都絞盡腦汁，將畢生「氹女仔」嘅說話技巧都展示出嚟，我心想:「原來冧女嘅嘢，唔係淨係用喺我嗰個日日詐型話我請唔度假陪佢嘅女友身上，仲可以要嚟救人！
終於，另一邊傳來WhatsApp回覆；「我想見你……」「BINGO！」大家歡呼起來。
紛擾終於停止，報案人也跟着去找事主了。不久電台傳來消息，成功救下事主並送往了醫院，ADO於同事們成功救回女事主之後，打電話向事主勸說一番，其中一句我很深刻：「阿妹，你咁執着都無用，佢既然去意已決，又何必用死嚟挽留呢？放過人哋，其實即係放過自己！」。
被救少女 多謝阿Sir一句話
然而，報案室內仍有很多市民等着報案，整個報案室又開始喧鬧起來。
同樣的忙碌，不一樣的心情，喧囂的夜晚，好像看到了一抹陽光。我是一個小警察，只是一個小小的警察。帶着信仰、帶着榮譽，從陽光中走來！
幾個月後，一家三口竟然送了一個生果籃到報案室前台，女生還笑着帶來了一句話：「多謝阿Sir你當日提醒我嗰句說話，『放過人哋，其實即係放過自己！』」作為警察的我們要緊記這句話，全心全意去面對自己作為警察的職責，對工作上所接觸到的漫罵和吵鬧一笑置之，這些都只會是成長過程中的回憶而已。（註：大小標題由本報所加） |
搜尋新聞
