由王梓軒、陳潔儀主演,劉松仁一手策劃兼導演及創作的音樂劇《利瑪竇》昨晚開鑼,挾着松哥聲勢,12場門票經已售罄。由於是松哥閉關作,所以認真得一絲不苟。前日總綵排上,所有演員全副武裝「踩台」。首次黏鬚上陣的梓軒即「利瑪竇」上身,並能講及唱出意大利文歌,令松哥激讚:「好正!佢已經入咗魔!真係好睇!佢已經做得好好!」
學拉二胡進修意大利文
今次梓軒在音樂劇中擔任非常重要的角色,為免不想影響到松哥的「金漆招牌」,他為今次演出秘密練兵,除了花四個月時間進行密集式排練外,他更學拉二胡及進修意大利文,壓力甚大。梓軒說:「綵排時,技術上係出咗啲問題,不過大家都好一條心,就算有啲乜嘢出咗事,我哋都會一齊去補位,就算做得好好時,佢哋都會幫你更上一層樓!」
陳潔儀彎曲身軀演與唱
陳潔儀(Kit)說:「雖然技術上問題嗰一刻係會覺得『唔係呀嘛!』但更加有鼓勵性,就係全體演員都上下一心,無受技術問題影響!」Kit飾演的女僕麥小妹,對她來說亦有一定難度,綵排時,Kit為了符合角色設定,更長期彎曲身軀去演及唱歌!
由於利瑪竇是意大利人,梓軒要由他的28歲演到57歲,於劇中有多個造型,帶上頭套、假髮及黏滿鬍鬚,造型維妙維肖,在台上演出時,整個人都散發出老外味,就連眼神亦交足戲,連松哥都忍唔住高舉手指公大讚。