歌手許廷鏗（Alfred）、鄭融及陳健安等前日在油塘出席活動，提到上月29日是Alfred的31歲牛一，他驚覺時光飛逝，轉眼入行10年：「記得參加比賽嗰時，介紹自己係牙科學生，21歲。（10年有甚麼感覺？）都仲年輕，而且機能都ok，希望唔好肥番，但如果我無做呢行，身形會脹大，我好鍾意食嘢兼做牙醫成日坐，見到啲同學都唔止肥兩個碼！」他表示將來演唱會可以騷身體線條，但不想像吳業坤這麼瘦，林欣彤亦叫他不要太瘦，因為鼻大，太瘦會顯得更大。問到生日願望是甚麼？Alfred希望保持身形，亦盼新歌《單數》能受歡迎。

雪藏點會仲拍劇

對於有傳胡鴻鈞自誇比林峯勁而被公司雪藏，Alfred力撐說：「佢唔會講呢啲說話，我生日佢趕過嚟玩一陣返去拍劇，如果雪藏點會仲拍？呢啲新聞得啖笑，佢唔會（自大），我就會講笑話叻過胡鴻鈞。其實每一個巨聲幫都盡自己能力做好每件事，佢哋拍戲、唱歌好多瓣數，我都自愧不如。」

同場的鄭融問到關心社會那個類別？她說：「希望可以爭取多啲產假。（要生啦？）唔係，唔關事，係我見朋友生完好辛苦就要返工，好難兼顧湊BB。又或者多啲婦女培訓，至於自己呢個行業，希望政府多多支持藝術、演藝界嘅發展。」鄭融指外籍男友亦有資格在港投票：「佢好關心社會、政治，會留意新聞。」 <採訪、攝影>陸曼美