藝人張繼聰及黃心美前晚一同出席「全新BMW X3發布派對」，阿聰表示自從有了小朋友後，座駕的Size愈來愈大：「因為家庭成員多，所以屋企有三部車，好享受揸車過程，因為我住得遠，車程耐，一個人揸車時可以好好沉澱同反思吓，我有個規矩，坐車時候唔畀玩電話。如果唔使開工，成日都會車太太，我就係司機，以前去旅行自駕遊都係我揸車，佢哋就好開心，但我要揸車，所以精神不振，後來去旅行都少咗揸車。」
問到阿聰與太太謝安琪揸車技術如何？他說：「我本來想話得，但大家都知佢上次整花咗條軨，但我要幫佢講番句公道說話，佢換咗四條軨都只係用咗一千幾百，但我之前撞甩咗個輪拱，整咗一大筆錢，相比起嚟，佢個傷亡程度係好小事。」阿聰下月生日預計會提前家人食飯慶祝，因為當日可能要開工，聖誕節會留港，因為是細女出世後第一個聖誕，想帶她睇聖誕燈飾及食聖誕大餐。
心美自爆駕駛技術水皮
黃心美被問到早前有傳妹妹黃心穎與馬國明分手，她反問：「幾時傳？我好少見心穎，佢忙拍劇，講都係講工作多。（佢有冇異樣？）冇，佢尋日拍完幾場喊戲都冇眼腫，唔知係咪滴眼藥水。」
心美又自爆駕駛技術水皮，雖然有車牌，但沒人借車給她練習。問到可叫男友借車給她？心美說：「佢唔肯，上次同男友、三妹同三妹男友去冰島旅行，租咗架車，10日裏我揸咗唔夠5分鐘，佢哋唔畀我揸，可能係我個頭開得唔好，16歲考到牌，當時喺溫哥華，揸媽咪架車送佢去機場，回程時撞咗埋燈柱，架車Total Loss，當時有架車想過線，我好驚想避開，鼓起勇氣打電話返香港講畀阿爸知，嗰次之後冇發生過意外。」 |
搜尋新聞
