《第二十七屆香港舞台劇獎頒獎禮》前晚舉行,鍾景輝、蘇玉華(阿蘇)與男友潘燦良、鄧萃雯(雯女)及廖碧兒等都有出席,其中阿蘇更入圍「最佳女配角(喜劇/鬧劇)」及「最佳女主角(悲劇/正劇)」兩個獎項,潘燦良亦有份角逐「最佳男主角(喜劇/鬧劇)」,事前兩人皆表示不緊張,見到自家品牌舞台劇《謊言 The Truth》獲六項提名,已經非常高興,潘燦良又笑言:「我唔緊張,抱住一種心態係陪蘇玉華嚟睇下佢有無獎攞,我梗係希望佢攞獎!」
毛俊輝奪男主角
最終潘燦良及阿蘇皆失落獎項,而憑《父親》奪得「最佳男主角﹙悲劇/正劇﹚」的毛俊輝,就公開多謝太太胡美儀,大讚因為有對方陪伴,自己才能興致勃勃地繼續創作。
從影68年的「戲劇大師」鍾景輝(King Sir)獲頒終身成就獎,大會安排68位熱愛戲劇的學生上台向他頒獎,King Sir憶述:「60年代大會堂啱啱起好嗰時,我係跑住上台攞獎,依家已經要人扶住上台。行咗演戲呢條路60幾年,由喺幼稚園天台扮羊咩仔,到中學參加戲劇比賽,到後來父母都支持我去外國讀搵唔到食嘅戲劇,再一直睇住香港戲劇發展,令我嘅人生更豐盛。」他坦言很開心沿路結識了很多同路人,而當晚見到這麼多年輕人與小朋友上台,相信香港本土戲劇必定能大放光彩。
雯女想演女強人
雯女擔任頒獎嘉賓,她透露一直有人找自己演舞台劇和拍電視劇,被問會否有機會返無綫,雯女則謂:「只可以講係有機會講廣東話啦。」想當年雯女與拍檔黎耀祥演的《巾幗梟雄》系列大受歡迎,講到若將來拍劇會否想再同對方合作,她認為不應限制住自己,並說:「我哋已經做咗咁好嘅角色,成個組合、台前幕後要天時地利人和先咁好,我唔想衰收尾,有啲嘢好好畀大家懷念就算。」再拍劇的話,雯女坦言不想再飾演女強人、大家姐,盼挑戰未演過的角色。雖然她暫時未想做媽媽角色,不過見到影后毛舜筠與惠英紅都有飾演母親,自己亦覺得可以一試。
廖碧兒避談男友
而另一位頒獎嘉賓廖碧兒就自言有興趣演舞台劇,不諱言最想跟蘇玉華合作。被問平時會否與富二代男友Calvin一齊睇舞台劇,她指雙方各有各忙,暫時都無機會。有指其男友以19億買下法國酒莊,並且是位隱形富豪,廖碧兒即採取避談態度說不清楚,稱自己只是因慈善活動與對方認識,大家亦各有工作。<文>娛樂部