張家輝前晚出席首映時,獲「異父異母兄弟」的張學友撐場,兩兄弟合照時惺惺相惜,學友更取笑做了導演的家輝連說話也「文咗」,好嚴肅、好正經,即刻想叫家輝做大佬! <文>娛樂部<攝影>梁迺枬
影帝張家輝執導及主演的電影《低壓槽》前晚舉行首映,除了主角張可頤及苗僑偉(三哥)等現身外,陳慧琳與家輝的「異父異母兄弟」張學友都有撐場!學友近月忙於巡唱,家輝事前都沒預計對方能出席首映,家輝坦言:「呢兩日同佢通電話都無諗住佢嚟到,咁啱問佢,佢又話逗留咗喺度,過嚟睇吓。」學友聽罷即謂:「嘩,做咗導演講嘢『文咗』喎,用『逗留喺度』喎!唔會好似我呢啲演員咁,講嘢無乜Point,做咗導演講嘢唔同咗,好嚴肅、好正經,我都有啲驚,即刻想叫佢大佬!」家輝即笑說:「唔使驚呀細佬!」
拒畀老婆關詠荷復出
學友大讚家輝的表現比自導自演《陀地驅魔人》時更成熟,家輝則謙稱仍有進步空間,很感激投資方讓自己大膽嘗試,亦有意再拍攝不同題材。被問會否再次跟學友合作,家輝表示:「佢邊度得呀?佢巡迴巡幾年,巡到行咇咁呀!」至於會否找老婆關詠荷復出,他更耍手擰頭稱:「機會比較微,佢去拍戲,屋企無人理,我仲得了嘅?我梗係要自私啲唔畀佢拍。」
張可頤兩任「老公」同場
近日家輝因國語發音不準被網友戲稱作「渣渣輝」,他理解網民並無貶義,純粹是覺得好玩和親切,所以不太介懷,又謂:「當然我唔會鼓吹大家叫我呢個名,但都阻止唔到,鍾意叫、叫得開心咪咁叫囉。」他其後再與張可頤與三哥受訪,可頤忽然透露兩男都曾飾演他老公,此時家輝爆出一句:「同你係老襟添!」場面十分搞笑。
三哥今次再度飾演型佬,被問可有獲老婆戚美珍讚賞,他即回應:「呢套戲有型梗係家輝,所有人造型都係佢諗出嚟,你留意吓呢套戲特色,個個男演員都同本身個髮型唔同,大家都好有新鮮感。」