名模Jessica C.(JC)在6月19日為老公安志杰(Andy)誕下第二個孩子,Andy透過經理人報喜,指細仔是重8.8磅、身長53厘米的巨B:「醫生都話好勁,近期好少咁大嘅BB,我哋全家上下都好開心。」
10幾分鐘生得
他透露太太選擇順產,入產房10幾分鐘就誕下孩子。JC的身體康復得很快,住院兩日已可以出院回家休息,更去了游泳、行街和吃雪糕。她感謝家人及朋友關心:「最感動係阿姨坐長途機由芝加哥飛嚟香港陪我待產,Andy媽咪同妹妹都有飛過嚟。今次生產咁順利,感謝上天畀我咁大福氣。多謝老公,嫁到呢個老公我真係好幸福、好幸運!」
自製溫馨短片
Andy除了推掉幾個工作陪老婆生B,亦有陪入產房,更第一時間讚JC是偉大的媽媽和示愛,又為囝囝自製溫馨短片。他表示兒子的中文名未改,英文名就跟已故美國搖滾樂巨星「貓王」皮禮士一樣叫Elvis。問到會否追第三個?Andy坦言等上天安排,但如果追亦希望等兩個小朋友先長大。
而JC亦希望順其自然:「大女Tessa見到細佬第一眼已經情不自禁不停錫,又好細心照顧細佬,無妒忌或者爭寵。」JC打算繼續為兩個小朋友餵人奶,而Andy就將於月尾復工在香港拍電影。<文>娛樂部