歌神張學友昨日以榮譽院士身份,為演藝學院「第三十二屆畢業典禮」擔任主禮嘉賓,學友穿上院士袍現身,觀看完畢業典禮後在台上致辭,全場即拍手歡呼,他分享加入演藝圈的苦與樂:「恭喜晒畢業嘅同學,見到你哋咁興奮,演藝界將來好有希望,希望未來見到同學喺唔同界別大放異彩,我本來記晒啲台詞,拍完200幾次手,一叫我個名就唔記得晒,依家照住讀。」
打算繼續做落去
其後學友攞出貓紙,分享入行34年的經驗:「我喺行內算係運氣好嘅人,我亦幸運地喺呢個行業工作咗接近34年,我打算繼續做落去!如果你希望入演藝圈可以發大財,賺好多錢嘅話,我建議你趁仲未入行馬上考慮投身其他行業,做地產、買股票,大家有無留意最新公布嘅福布斯富豪榜,頭一、二、三百位,都搵唔到一個、喺世界上、行內大家熟悉嘅名。」
他笑言如果是想「紅」,只要在巴士上與阿伯吵架,或拍條青春無敵少布的嬉水片段放上網就可以。
不求名利全為愛
貴為歌神的學友,始終覺得自己「唔夠好」:「我深信『覺得自己唔夠好』嘅態度,就係我可以喺呢個行業生存嘅主要原因,當你覺得自己已夠好或是最好,就無要求自己再好嘅動力同空間。」他亦指勉勵入行不是為了名和利,是為了「愛」。