組合RubberBand、陳奐仁、徐加晴等昨日到尖沙咀出席音樂會,陳奐仁表示早前為減脂肪肝做運動,但怕傷舊患所以暫停,他說:「依家要解決啲舊患,我背肌、三頭肌、膊頭同手臂都勞損。因為做gym太勁,玩音樂都關事,因為我孭結他同用mouse都係右手。」
他透露會看骨醫拉頸:「唔知醫幾耐,初頭我好沮喪,好急住好番繼續操,但如果傷咗搵唔到錢,對唔住自己又對唔住屋企人!醫生就鬧我,話我係唱歌,唔係做健身!」他表示太太有關心情況,但沒有刻意為他按摩,陳奐仁笑說:「反而關心完我佢就頭痛,調番轉我幫佢按摩,因為我痛佢就痛,我唔病佢就無事。」
RubberBand開騷加場
而RubberBand將於9月26日假九展舉行音樂會,早前售票反應熱烈,決定加開27日一場,適逢27日是主音6號生日,隊友笑言整壽包公仔出售,等觀眾掟上台送給6號。泥鯭則指平時出席活動會早到,所以經常責備遲到成員。早前他們唱Cookies的歌及跳舞,問到會否在音樂會跳舞回饋歌迷,泥鯭說:「如果再加場先考慮,怕大家要洗眼,但我要打鼓唔可以跳來跳去,唔可以好似陳展鵬咁吊高倒轉打鼓,製作費好高,而且咁樣實聽到我講吊吊聲。」