鄭秀文(Sammi)昨日出席活動時,童心未泯的她甫見米奇老鼠現身即翹着手擺不同甫士拍照,更齊齊大派飛吻,又大讚米奇老鼠充滿活力、樂天和開心。<文>娛樂部 <攝影>梁迺枬
歌手鄭秀文(Sammi)昨日到銅鑼灣出席「米奇90周年展覽開幕禮」,在台上大讚米奇老鼠充滿活力、樂天和開心:「我細個曾經收過米奇老鼠公仔、玩具同貼紙,覺得好開心。好想帶佢食香港嘅地道嘢,好似腸粉咁,佢都唔使減肥啦!呢個展覽有接近90件展品,有啲同fashion有關,我好有興趣睇。」其後米奇現身舞台,台下歡呼不斷,Sammi亦非常興奮,二人翹着手擺不同甫士拍照,更齊齊大派飛吻!
老公花名叫「老鼠安」
受訪時,Sammi直言童心大爆發:「不嬲都有童心,畀米奇再撩動多啲,佢真係好有活力,一出嚟就畀人好多希望,童年回憶都走晒出嚟,好想即刻買番隻米奇公仔。(去迪士尼補辦婚禮?)吓?暫時無呢個考慮,不過見到人哋都有好好嘅回憶。」
談到老公有「老鼠安」的花名,Sammi笑言大會邀請自己與這事無關,只是看中自己有童心:「90周年好值得紀念,係好長時間,多謝大會邀請,希望佢哋送番隻公仔畀我。(叫老公送?)有贊助開心啲。」
風災令環保意識提高
提到昨早5時就起床做運動,然後拍廣告和出席活動,她坦言已習慣早起床:「有時如果我5點要化妝,我咪3點起身,確實係好辛苦,不過自己慣咗,咩都係自己選擇,選擇咗就唔好嗌辛苦,因為你可以選擇唔做。」她認為一旦作了選擇,就帶最開心的心去做。
至於超級颱風山竹,她慶幸沒對自己的家造成大影響:「因為騎樓有鐵閘,窗無搖得好緊要。但我有一直睇新聞,見到好多人都好慘同受傷。唯一好少少就係提高咗大家嘅環保意識,因為海水沖咗咁多垃圾上岸,提醒大家更加警剔,以後用少啲塑膠。」
Sammi坦言看到很多互愛精神,但希望不要再打風,因為很可怕:「打風之後嗰日我要開工,我坐公司車,但見到市民坐交通工具返工都好辛苦,好多樹冧咗,不過有關當局已經好勞苦咁不停清理,個心只有感恩,依家慢慢回復正常,覺得個精神好好。」