組合Twins蔡卓妍(阿Sa)及鍾欣潼(阿嬌)前晚在澳門開騷,引來大批黃牛炒飛,更離譜到連票尾亦炒至1,600多元一張;阿Sa表示阿嬌曾send message表示掛住她,令她當堂打個突,因平時兩人不會講這些肉麻說話。 <文>陸曼美
《#TWINS #LOL #世界巡迴演唱會》的終點站前晚在澳門威尼斯人金光綜藝館舉行,終極最後一場,門票開售已秒殺,想不到前晚爆滿之餘,又引來大批黃牛炒飛,更炒到離晒譜,竟然開場炒,中場繼續炒,中場有歌迷離座去廁所,即被人圍攻問有沒有票尾出售,一張票尾炒到1,600多元,更有歌迷因為不夠人快手搶不到,在演唱會門外大哭,館外圍了數百沒飛進場歌迷,一直坐門外,求工作人員打開門讓他們齋聽歌。
場內觀眾熱到爆炸,握手環節期間,阿Sa突然大叫被fans指甲刮到左手手背甩皮,仲搞笑話:「你哋係咪淨係鍾意阿嬌,唔鍾意阿Sa㗎。」
狂撲學友華仔飛
對於這次演唱會極受觀眾歡迎,去到世界各地都爆滿,Twins當然十分開心,阿sa表示希望休息過後,不久的將來Twins會有另一個新的演唱會再跟大家見面。
完騷後知道演唱會炒飛炒到半場的票尾也有人搶,Twins十分驚訝,對此直言這情況好難控制:「場地可以坐一萬人,如果每個人都咁做,最高峰時期咪有三萬人入咗場囉,其實咁樣真係唔好。」
說到近年演唱會撲飛都辛苦歌迷,阿Sa表示連自己撲飛亦困難重重:「好多Auntie都託我訂華仔同學友嘅飛,我之前問老闆(楊受成)有無辦法?點知老闆話『我都死啦,撲唔到飛!』」
雙方至愛齊捧場
前晚阿嬌的老公、老爺、奶奶及家人也有來捧場,阿Sa男朋友也有來支持,阿Sa表示本來演唱會極受歡迎,很多地方也想她們再開多幾場,但她的聲帶一直未好,所以一定要休息養聲。
最近除演唱會兩人各有各忙,所以少時間見面,阿Sa話:「上星期阿嬌send message話好掛住我,我當堂打個突,我哋平時都唔會講呢啲。」阿嬌就說:「我上完個真人騷《爸媽輔前班》之後開朗咗,要強迫對住一班陌生人,所以特別掛住你。」
講到同老公賴弘國(Michael)一齊拍內地真人騷《爸媽學前班》,阿嬌說:「今次節目都學到好多嘢,起碼知道我老公會係一個好爸爸好有耐性,不過我哋暫時無計劃住,起碼兩年後。」講到12月在香港舉行的婚宴,阿嬌說:「依家喺度準備中,因為我哋仲未入紙排期,一搞掂好晒就會通知大家。」