還不到兩個星期,鄭伊健「Along with Ekin Live Concert」就要在紅館開鑼,練歌綵排如火如荼的他,早前為拍攝的全新廣告曝光。廣告中,伊健穿梭畢業禮、美式足球賽和影六代同堂全家幅的影樓,並探討全城熱話:「長命百二歲」,如何為成世人流流長做好計劃?伊健考慮重返校院,笑言拉埋導演劉偉強和音樂監製陳光榮做同學仔,一齊學習、一齊走堂!
拉劉偉強陳光榮上堂
就算人生有120歲壽命,也要有強健體魄才可以繼續精采生活,伊健一直非常注重養生和愛惜大自然,所以如果重返校院,他希望修讀一些科目以多角度了解世界,並希望透過學習更了解大自然和地球。他說:「現今太多人只相信科技,但我就更相信大自然力量,大家唔好忽視,地球好多災難都係同大自然有關,所以我想學習多啲點樣同地球溝通。」平時伊健如何跟地球溝通呢?他說:「打坐、靜默、買少啲科技嘢……(你喎?)我依家通常睇,好少買,希望產生少啲廢物,盡量啦!」如果要拉埋身邊朋友一齊重返校院,圈中朋友必選導演劉偉強,以及與他音樂上合作無間、月底紅館演唱會的音樂總監陳光榮。
伊健笑說:「如果要揀兩個朋友同我一齊返學,不如陪我一齊逃學。第一個肯定係劉偉強,哈哈,佢一睇就知唔係讀書人啦!不過佢好本事,成為一位好出色和好出名嘅導演,佢唔係淨係靠讀書,好多嘢都喺社會學返嚟;至於陳光榮不但係我工作夥伴,我哋一齊成長,一齊增值自己,佢都喺人生經驗上學習。」 |