郭富城昨日以品牌優雅形象大使身份，到亞洲博覽館出席「浪琴表香港馬術大師賽」，已經第六次為活動擔任頒獎嘉賓的他，大讚活動規模又再提升，現場亦增設更多親子玩意。

貴為馬主的城城，被問到有否讓女兒接觸良駒？他說：「之前我嘅愛駒出賽，都有帶女兒入場，仲同佢講呢隻叫『馬馬』，佢而家見到馬都會叫馬馬，好得意、好可愛。」他表示將來會讓女兒學騎馬，但現時正籌備世界巡迴演唱會，太激烈的運動要避免：「我好鍾意騎馬同賽車，都要忍住暫停。而今次世界巡迴演唱會做兩年，大概開100場，3月頭開始。」

陪太太分娩

城城將到北京、上海、日本及韓國等地巡唱，女兒會否很想念爸爸？城城透露會與女兒視像通話，女兒每次見到電話都會叫「爸爸，Hello！」令他感覺勁冧。

問到太太方媛預產期時，會否預留時間陪她分娩？他指公司會騰出時間，讓他陪太太準備。問到是否為遷就太太預產期而安排香港站演唱會於12月舉行？他說：「未定實，完成手上嘅巡迴先，香港站有機會喺明年。」

攞獎平常心

早前城城與太太到經理人小美家拜年時，太太明顯腹大便便，問到是否已懷孕六個月？城城即甜笑說：「快㗎啦，快㗎啦，我都享受多啲家庭成員。依家好興奮，身邊好多朋友都會教我，另一個小朋友出世，就要送份禮物畀大姐姐，令佢唔好呷醋。我都係學習中，希望工作上有所突破，因為唔止係fans睇，囡囡都會睇到，令我有更多動力。」

談到憑電影《無雙》獲提名金像獎最佳男主角，城城坦言要多謝太太：「當時BB仲未出世，佢令我唔使擔心佢第一胎嘅心情，可以投入工作。之前我都藉住呢齣電影攞過獎，每個頒獎禮嘅評審都唔同，我自己好尊重，我自己努力咗、付出咗就得，好開心可以入圍，無論邊個攞獎，都會戥大家開心。」問到可有信心贏有份提名的周潤發？城城表示，作為一個演員，信心一定要有，但不可以爆棚，會以平常心做好自己。