藝人佘詩曼（阿佘）前晚出席頒獎禮時表示，若微博粉絲人數衝上兩千萬，會考慮效法惠英紅一樣晒三點式相派福利！而容祖兒獲頒最具影響力歌手，感到十分興奮。

藝人容祖兒、佘詩曼、黃宗澤、吳卓羲、胡定欣、馬德鐘、陳瀅、吳克群、乃木阪46成員等前晚到尖沙咀出席首屆《微博星耀盛典》頒獎禮。

祖兒獲頒最具影響力歌手，她說：「其實我最希望影響到人哋開心就得，作為一個歌手，唔好教壞人，有時遇到唔知點處理，就會諗如果係劉德華會點處理，張學友又會點處理。又會提醒自己做嘢要檢點啲，有時啲fans都會同我傾訴，讀書嘅會同佢哋講，考第一會請睇演唱會。」問到有沒有這麼多門票？祖兒說：「反應好咪加囉，自己做得到都會做。」

自知不是做生意材料

對於好友蔡卓妍（阿Sa）最近做老闆，祖兒表示自己沒興趣：「咪搞，我絕對唔係呢方面材料，其實阿Sa喺我哋之中最成熟嘅一個，做嘢最有步驟，我哋呢啲係耍盲拳，我最醒係唔使做生意已經知自己係咩材料。曾經試過張敬軒叫我搞錄音室，我都覺得件事好偉大，但又唔知點開口同阿媽攞錢。」她笑指媽媽是最佳的龍門。

嫻妃帶挈多500萬粉絲

佘詩曼獲頒年度實力演員，微博粉絲人數已衝上逾1,700萬，她表示因為《延禧攻略》嫻妃一角令她多了500萬fans，想不到威力咁大。問到以後會否更活躍於網上平台，以及出post時會更小心，阿佘表示出post要看心情及時間，之前都試過送相、小禮物派福利。問她若fans衝到兩千萬時，會不會像惠英紅一樣放三點式相派福利？阿佘表示會考慮，又大讚小紅姐身材正！

對於林峯將返回無綫拍《使徒行者3》，問到飾演釘姐的阿佘會否被邀回巢助陣？她坦言有接洽過，不過夾不到檔期，4月底要返內地拍古裝劇，偏向遼代比較有蒙古feel，到時要去內蒙古及要騎馬，都怕整親條腰，上次已經試過整親。提到早前劉德華也是因騎馬受傷，她說沒無辦法，陰影一定有，雖然有替身，但都想盡量自己做，因為騎馬好玩。

黃宗澤吳卓羲齊攞獎

黃宗澤憑《飛虎之潛行極戰》奪得人氣電視劇男主角，更和吳卓羲一起奪得人氣電視劇拍檔，黃宗澤指前天是第一天放下拐杖，有種老懷安慰的感覺，因為年紀開始大，康復時間比較慢。他又指因為很久沒有健身，所以有一種渴望做運動的感覺，以往舉18磅的啞鈐，現在舉6磅也有點吃力，所以要靠飲食來控制體型。談到吳卓羲再次回到樂壇，黃宗澤說：「等佢先，遲啲再整番首合唱歌，嚟緊4月中都會同佢開工，希望睇下年尾有無機會再做。」談及樂壇欠他一個交待，他說：「久我一個膠袋啫，好想套用古天樂一句說話：『我好鍾意唱歌，但我唔識唱歌。』我聽到呢句之後，即刻袋落袋，學到嘢。要聽唱歌技巧一定要容祖兒啦，我呢啲玩玩下。」