前晚《第38屆香港電影金像獎》完美落幕，英皇電影豪取12個獎項，其中由莊文強執導，周潤發、郭富城等合演的《無雙》囊括七個獎項，成為本屆大贏家；而由林超賢執導的《紅海行動》則奪三大獎項；旗下藝人黃秋生奪影帝、惠英紅奪最佳女配角，認真威水！

金像獎大會慶功宴嘉賓滿堂，英皇集團主席楊受成博士不但偕《無雙》及《紅海行動》團隊開懷歡聚，出爐影帝黃秋生及最佳女配角惠英紅亦先後現身，與楊老闆一起慶祝；遺憾跟影后寶座擦身而過的蔡卓妍（阿Sa），雖敗猶榮，在一片歡呼聲中大方亮相，依然笑臉迎人、神采飛揚，充分顯示大將之風，深信以阿Sa的實力，以及敢於挑戰自我的鬥志，勢必再接再厲，成功在望！

讚曾美慧孜演得出色

對於失落影后寶座，阿Sa未有失望，反指整晚頒獎禮氣氛很好，覺得一班新電影人很努力。她直言出爐影后曾美慧孜獲獎電影的角色非常難掌握：「我覺得《三夫》套戲唔止係睇嘅程度，佢真係演得好好，靜初（張靜初）都演得好好，就算對手係周潤發同郭富城，佢都可以突圍而出，真係非常困難。」

問男朋友石恆聰可有安慰？她說：「唔需要，因為場內收唔到電話。」她表示完場後收到幾百個message，大多數是容祖兒、關智斌及鍾欣潼（阿嬌）。阿Sa說：「佢哋睇電視為我打氣，一個食蕉一個食橙，好感恩有一班好錫我嘅朋友，自己亦有好好嘅際遇。」

惠英紅恨攞視后劇后

再度奪得最佳女配角的惠英紅表示，其實好大壓力：「我係有信心，但怕人哋叫我讓，驚啲評審會覺得又係你呀，不過今晚我都覺得評審公平公正。」

小紅指今年得獎者都是她的心水，電影圈近年極力支持新導演，惠英紅說：「拍戲唔可以唔收錢，利是都要收一封，呢個係意頭。」小紅指自己未試過攞視后及舞台劇獎，希望攞埋就是人生大滿貫。