【大鐵論馬／大鐵】今周三谷草夜馬首次在今季使用C+3移欄，觀乎上季大部分賽事都比較有利內叠前置馬，尤其是短途。今次第一口孖T落在二班以及四班的賽事，兩場風格截然不同，先講頭關賽事，「幸福掌聲」上次抽到不利檔位沿途走勢欠順，再加上中段騎師田泰安自殺式踩油，入到直路初頭仍有競爭力，不用大敗已經偷笑，今次換人兼抽到一檔有助穩定走勢，早前雷神都攜馬試過谷閘走勢暢順，發揮正常應可挑戰列強。前度巴黎大賽冠軍，曾經擊敗「繁星布」的「喜蓮彩星」連續兩場利敬國都發揮得好好，今場早段攞位十分關鍵，跑得順再可超班。「非凡才子」應係呢組最具期望的馬匹，上季尾二班已經成功連捷，今季預期可向上望挑戰級際賽，重磅都要拖。「合拍威龍」谷戰成績好，可惜出閘不準成為詬病，新勝馬都要拖住以防萬一。「勇敢傳說」似乎已經跑盡，但若有其他馬匹失準，呢隻忠心馬又會偷到一席。

尾關方面，「富萬家」上次差少少放到，今次形勢相若或可再賺，四班短途有前速分子不能輕視。「神州俊馬」自從贏馬之後在重磅區掙扎多時限於接近，今次有內檔幫手又有接近機會。「皆旺財」上次前段形勢不算樂觀都能夠贏馬，而且擊敗的對手實力不弱，今次內檔可能要考驗有遮擋之下馬兒會否適應。「金碧輝煌」表現比較神經刀，不過如果今場如果步速拉快會有利，可以冷敲。最後兼顧「一路順風」，雖然上次跑快活谷轉彎唔算靈活，不過馬匹質新但求有進步。