【朝早有動靜／韋柏】呂健威馬房迄今取得八場頭馬，數目不多，距離達標尚有一段路，此外，踏入2017年以來，呂廐尚未取得突破，翻查對上一場頭馬是12月27日的「威勢之寶」，所以必需加倍努力，務求在短時間內贏多幾場。

今次谷草猴年送歲賽，舉行九場C+3跑道賽事，呂廐出馬三駒，陣容單薄，不過，並非全無攻擊力，尤其該三駒都是冷馬，是但有一駒得手，派彩一定和味。

第八場三班1200米，「海都巨星」今季初出冇段好睇，次仗不良於行退出比賽，12月中復出角逐此程，由巴度拼得第三名，只以短頭位負於「開心有你」，走勢勇猛非常。

巴度連番親試

「海都巨星」拼後不久便重投操練，騎師巴度幾乎包辦所有快跳課期，重視程度比起上場猶有過之，晨課動態認真，看來騎練二人好想爭取勝利。至於晨課的觀感，此駒向來火噴噴，近來朝早的走勢亦然，勇態畢呈。這次續跑上場入圍的路程，又是C+3欄，一切依舊，期望可以叩開勝門。