【頂白篇／馬宜中】剛戰睇淡嘅兩匹，分別係「乘勢好運」及「佳龍駒」，後駒熱得好透徹，亦順利跑出眾望所歸，睇番之前多屆香港經典盃都唔利大熱，除了07年「俊歡騰」贏打吡預賽外，差不多冇一隻大熱勝出，事隔十年「佳龍駒」平磅賺晒分，成功打破數據，筆者衰得甘心，反正呢匹馬咁多普羅大眾投注，贏出一定可喜可賀。 至於「乘勢好運」，就進一步確定評分見頂，目前有啲似「嫡愛寶」技止於此，上二班負輕磅或跑三班85分賽，都只係位置之材。

今次兩匹熱不值賭W，分別係「勁勇威龍」及「快樂寶貝」，先講「勁勇威龍」，上季喺胡森旗下56分用湛明諾，以短馬頭險勝隨後兩捷「金碧旺旺」，目前落到49分似乎好着數，但今季跌穿咗50分後屢拼只能入位，文家良個勢亦唔強，熱捧獨贏唔太值得。

「快樂寶貝」61分贏完，之後最叻兩次跑第三，上次一檔用羅理雅都冇威脅，今仗搵雷神要追多個幾馬位，話易唔易，捧W未免太冒險。