【圈中人語／莊美倫】候任特首林鄭月娥上周公布新政府智囊，鄉議局主席阿Ken劉業強，成為新任行會成員之一，政途上更上一層樓，佢爸爸劉皇發就梗係開心，今次兩父子以「龍船」及「騂龍」及團體「哥哥仔」三駒出戰，新界擁躉就一定希望錦上添花。
上述三駒，當中「騂龍」上次3.3倍熱門輸成廿個馬位，表面上今次轉場，都冇乜睇好理由，但大家唔太善忘的話，或者都記得「龍船」季中由戶崎圭太爆冷，之前兩周先輸成條街，所以只要有信心，又使乜擔心咁多？至於「龍船」近績好，當屬爭勝主角。講到「哥哥仔」，馬主最醒團體成員除咗發叔，仲有個叫尹國根喺新界都有多少名望，佢所屬熱門團體，呢次仲有隻「烈風小子」，可惜兩駒都未贏過。
烈風小子爭分脫險
「烈風小子」出自國際馬匹拍賣會，成交價250萬港元，話貴就唔係貴，但來港後逾廿個月先出得，期間左前足曾經持續不良於行，咁醫藥費加養馬費又另一條數，血統上母系Sell Out贏至哩半，今次難得再有谷草2200米，路程就一定啱，係睇佢本身能力，如果贏到或跑第二，加多5分升上21分，咁就可以逃出生天。
搜尋新聞
