【風花雪月／子樂】沈集成愛徒巫顯東剛季魅力四射，風頭幾乎蓋過一眾師兄，雖然失意於告東尼獎，不過與得獎者大師兄梁家俊只係相差一場頭馬，以一位剛出道嘅小伙子，首季頭馬數字有本事力迫經驗豐富大師兄，雖敗猶榮啦！

以前一般見習生，因為騎技未成熟，唔會有太大號召力，但係時移世易，依家馬場生態完全唔同晒，見習生有時惹飛程度不下於雷神，就以巫顯東為例，剛季贏過唔少熱門，其中以「獅子驄」第二捷嗰場最熱，獨贏賣到2.2倍，WP注碼超過1,500萬。

回顧呢位沈集成愛徒，剛季二十四場頭馬當中，原來有唔少出自1200米及以下路程，數一數共有十四場。唔係話佢冇贏過長途，但1800米及以上只贏到一匹「心中有善」咁大把囉，以佢跑過數十場長途賽嚟講，頭馬數目梗係少，所以暫時睇呢位見習生都係短途叻啲。