「猛闖」（近鏡）北半球馬首季上陣已贏。

【洪禮賢講馬】賽馬是一項刺激緊張兼而有之活動，偶爾會提心吊膽、患得患失，有陣時柳暗花明又一村，或者臨天光瀨尿，總之，只要參與者投入程度較大（不一定係病態賭徒），必然有過上述幾樣經歷。

賽馬過程當中，最扣人心弦其中一部分可能係壓線一刻影相分勝負，兩三駒或群駒鬥到難分軒輊，騎師們殺得天昏地暗，你一鞭我一步，終點前彼此叮噹馬頭，時間彷彿在那一刻凝住了，而馬迷只能夠屏息以待，金睛火眼睇住有份下注那匹馬，究竟馬頭或鼻位是否凸出（如果係買QT，壓線時睇得更辛苦、更費神）。

像這樣嚇破膽情景，各馬迷早已見慣，可是卻不會習慣，要是本着沒有所謂、看透得失之士，自然不覺得是甚麼一回事，若是略帶狂熱者，當每一次遇上「影相」，既震撼又心慌。

猛闖險勝短馬頭

剛季5月13日沙田草泥地日賽，第六場四班1400米的而且確令洪某提心吊膽，皆因該仗WP下注了「猛闖」，跑至直路中段過後，一方面要追趕「海嵐一號」，另一方面要頂住「鑽飾傳奇」來襲，前駒最終險勝短馬頭，那刻心情除了緊張就是緊張，所以有時覺得博彩活動相當辛苦。