【本報訊】剛周日國際賽完滿結束後，昨晚跑馬地八場賽事大為失色，只係由三至五班賽事擔綱，三位勝出國際賽的騎師，包括羅理雅、潘頓及梁家俊，當中只得前兩者有馬贏，羅理雅在第五場出策徐雨石馬房「勁嘉輝」，閘前落飛至4.5倍次熱門重開勝門，此駒上季跑至第五仗勝出，今季又係第五次上陣交出頭馬，認真巧合。至於羅理雅其餘三匹坐騎，亦有「勁有波幅」及「慣勝共贏」跑獲亞軍，全晚四匹坐騎取得1冠2亞，入Q率高達七成半。
講到潘頓，昨晚共出策七駒上陣，雖然首六匹馬全部跑至三甲不入，但衰家食尾胡，替沈廐「育成寶貝」取得今季首捷；而梁家俊騎足八場雖然冇馬贏，但亦於第二場替沈廐「八太子」取得亞軍，以及第七場「爪皇烈焰」取得季席，成績尚未算太差。

巴度獲2冠1亞
至於馬會騎師巴度，此位法國籍騎師雖然對上七個賽日均冇馬贏，但昨晚僅獲五匹坐騎之下，第二場先替苗廐「再石磨藍」爆20倍冷W，其後第三場出策羅廐10倍「路路發」跑獲亞軍，之後第六場替沈廐9.7倍「威信」打開勝門，全晚五匹坐騎取得2冠1亞，成績極佳。
不過騎師王寶座，最終又落在騎足八場的莫雷拉身上，此位榜首騎師，頭場已經替「歐洲之星」取得轉投羅廐後一出即勝佳績，其後尚有姚廐「航天勇將」大熱跑獲季軍，以及徐廐「靚紫荊」取得亞席，到第七場更替東廐「劍聶風」打開勝門，全晚取得2冠1亞1季，累積34分成為騎師王。
最後一提，全晚重頭戲香港高爾夫球會百周年盃於第四場舉行，由李寶利出策葉廐的「榮冠大道」雖然轉彎一早移出外叠蝕位，但入直路後愈衝愈勁，最後更爆冷突圍成功，騎者連贏兩日之餘，其後場次先替「神乎其技」及「開心遊戲」取得季軍，尾場再替「幸運興隆」跑獲亞軍，全晚七匹坐騎取得一贏三位。

羅富全出五駒四上名
練馬師方面，榜首練馬師羅富全昨晚出馬五匹，當中「歐洲之星」先拔頭籌，其後的「路路發」及「慣勝共贏」跑獲亞軍，「開心遊戲」則取得季席，只有「肇慶威威」跑獲殿軍，全晚五匹馬悉數跑入前四名，上名率百分之八十。