【風花雪月／子樂】依家剩低三位練馬師未夠數，鄭俊偉欠2W、李易達欠3W同埋告達理欠7W，理論上，後者冇可能會上到岸，而前者就算今季贏唔夠16W，其實都冇乜所謂，因為生命有take two，佢咁耐以嚟只係首次未達標。
換言之，李易達正在孤獨作戰，而目前佢贏得獎金約1,440萬，距離下限尚差接近410萬（如贏夠1,850萬獎金，14或15W都可畢業），即係冇乜機會贏場高獎金賽事達標，就算禮拜日畀佢贏場二班賽，都係增多186萬，仍然未望到家鄉，因此，佢必要贏到3W才可逃出生天。
睇睇今次李廐出馬數量，正選馬多達七匹，係最近幾次賽事當中，出馬最多一次，忽然派咁多馬跑，無非係想多啲機會，總之贏得一場得一場，抱住呢份精神梗係冇錯啦。
初步睇過李廐那批正選馬，部分唔係冇能力，但都係有啲難處，一係近績差啲，一係操練有問題，之不過呢啲可能唔係問題，因為近績差唔代表冇狀態，而操練唔妥當，唞得耐咗或因禍得福，所以，呢個禮拜日千祈唔好當佢流，點都要執一兩隻嚟買吓。