【風花雪月／子樂】好多新任嘅華人練馬師，初時總係會對外講實撐本地騎師，然後就係講一套、做一套，係就係支持本地騎師，仲用行動證明噃，不過畀啲咩馬佢哋跑，大家心知肚明啦，現實社會冇計，畀啲本地騎師搏馬，一個唔好彩搏輸咗，老細詐晒形，反而用紅鬚綠眼嘅，結果一樣係搏輸，但練馬師唔使受氣，用到老外喎，有晒下台階。
睇番今季紮職嘅丁冠豪，開季到依家有九駒跑過，數目唔係多，名單包括「勝利寶石」、「銀城福星」、「人和家富」、「快樂寶貝」、「飛壹般」、「海之濤」、「幸運神駒」、「喝采」同埋「自由飛翔」，係得一隻「勝利寶石」由老外利敬國執韁，其他全部係本地騎師，譬如黃俊、梁家俊、潘明輝、黃皓楠與蔡明紹，九份之八係本地騎師，唔使講嘢啦。
呢個情況將會維持幾耐？樂仔點會知喎，我唔識丁冠豪，又唔係佢肚裏面條蟲，但係新開倉即以行動支持，唔係齋吹，呢種處事態度值得讚賞。當年丁冠豪做過騎師，深明華將處境係點，搵食有幾艱難，人心肉做，依家佢坐正，提攜後輩，抵佢成績咁好。