【避重就輕／阿興】泥地跑道的賽果，好多時都有連貫性，同日賽事利放或利追，只要係有偏差，好多時會連場相同，好少會出現單咷的情況，所以其實筆者覺得泥地賽都幾好賭。
不過剛周日的三場泥地1200米，卻有點不同，頭場四班賽「軍力勁」沿途二叠，直路踩油立即走甩輕取對手接近三馬位，雖然以前置馬身份取勝，但同場放頭馬「勇冠多」卻在末段力弱，最終大敗五個多馬位，可見放得出未必好。
其後去到第二場五班賽，「大龍騰」沿途外叠後上掄元，亞軍為前置跑法的「競駿千里」，另一匹後上馬「勁快步」追獲季軍，看似後上馬較為着數。
等到第六場舉行三班賽，「香江穩勝」、「鞍歌」及「真好漢」乃沿途一至三名馬匹，基本上直路上無馬匹有能力大幅追前，看此場賽果，覺得又回復到利前置的情況，所以是日泥地賽的跑道情況，好似女人的心情一般，一時一樣，如果見到第二場利後追，在第六場捧後上馬的話，認真損失慘重，所以賭馬真係不宜孤注一擲，尤其係泥地賽，雖然好玩，但太有信心未必係好事，反而小賭怡情，才是長玩長有之道。