【掌握大局／蔣偉權】明日多項大彩池有多寶累積，而且大馬房均精英盡出，相信會係馬迷瓜分多寶獎金的好機會，雖然瓜分之後派彩未必太多，但有得分總比冇得分好得多，如果想賭得輕鬆點，就要在頭兩場賽事搵點賭本，然後才可以一本萬利。
第一場四班1200米草地，「帝豪寶貝」上季煞科日及今季首戰，均於此程交出頭馬，上仗抽到極為不利的十二檔，沿途三叠望空，大敗包尾不能作準，今仗抽到八檔雖然要睇際遇，但此駒畢竟曾經五勝同程，對手亦不強，贏位兼投分分鐘會帶來驚喜。
第二場四班1650米泥地，「大步走」上季首戰在此程大熱取勝，當時鞍上人係雷神，其後此駒四度上名，騎者分別為莫雷拉、郭能（兩次）及巴度，今季三戰此駒配蘇狄雄及黃俊出戰，均跑至不入前五名，賽績上已經充分反映出，此駒需要硬功大師傅才可以迫出真正實力跑入前列，所以今仗強配郭能，已經係出擊先兆，回爭一哩勝途更合腳法，有力在此贏馬交代。