「勇驹」（前）曾三度胜出三班赛。

【神祺小子／祺神】马不停蹄，今日上演十一场田草赛事，採用C+3栏，记得十几年前，笔者初接触赛马，老前辈常说C+3栏利放头，买晒内档同放头马就掂，当然佢有佢道理，十年前特别快活谷，一只马跑C+3栏抽得内档加上有前速就如打电脑online game的「大技」一样，非常大杀伤力。但日子久了，偏差成日临场先知，笔者仍醉心研究场地偏差的原因是深信呢样嘢真係帮到自己拣马，相信日后会有更多更多新一代研究呢个话题。
今期推介第四场四班1600米，「勇驹」上季总场次678用雷神跑同程蚀尽慢步速后上跑第二，跑第三名的「宝正宝」再出跑1800米快放再上名，今季都有一场头马，赛绩绝对有水凖，咁「勇驹」之后发生咩事呢？725场次去谷草1650米又蚀超慢步速跑第六，之后764场次走去跑泥地，遇到不利追的湿泥跑第五，今季首战气管有痰，抹咗去，157场次遇上大利前置偏差，冲赢「大运起」，上仗202场次临场有雨不利追，加上超慢步速其实当没跑过，今次赛事退出咗两只马之后得九匹马跑，只要骑者不要留到最后，应该可以爆一段赢马！
另外拆组第六场四班1600米，「劲好玩」今季四战1400米，总场次077，只係输畀再出再赢的「数煳勇士」。笔者留意到「劲好玩」是一匹贴栏领放特强的马匹，你可能会问，上次都係贴栏啦，但上次内栏全日较差，同埋今次上1600米放头段速上应该比1400米较为轻松，一档啱晒发挥！