豬肉，係大家經常食嘅肉類，依家世界物流發達，咩國家嘅豬肉，或唔同品種嘅都可以食到。但亦因為咁，一旦某種豬肉有問題，世界各地嘅人都會有機會中招，所以食物安全真係好重要嘅課題。
今日想講下日本岩手縣花卷市發源嘅「白金豚/Platinum Pork」。
當地係世界知名詩人、童話作家宮澤賢治嘅出身地，你地又知唔知呢？岩手縣土地廣闊、海岸線好長，海鮮類好有名；內陸幅員廣闊，農產亦好發達。我認識位白金豚嘅生產者，所以上次有機會去岩手縣時就特別試咗好多唔同烹調方法嘅白金豚。
首先第一餐因去到已係黃昏，入住山の神溫泉，浸浸溫泉後就開餐試白金豚火鍋。呢種豬肉特色係帶脂肪之餘，脂肪唔會留喺口，唔會覺得油膩，肉好爽，無羶味。平時食豬肉Shabu Shabu，一定出好多灰汁 (灼肉後會浮起白泡)，但呢隻肉就好少灰汁，聽講佢嘅脂肪含量只係一般豬嘅1/3，所以感覺肉較爽，可以食多幾片都唔膩。
第二日，我就去咗白金豚老闆太太開嘅餐廳，試下洋食嘅做法，有豬肉漢堡、煎豬扒等，兩者都好Juicy，口感唔會死實。佢地公司都有過百年歷史，發展畜產業都近60年，問佢呢種豬嘅飼養方法，原來好講究，好矜貴。豬BB出世至成長都用奥羽山脈天然泉水，再經鑛石過濾過嘅活性水嚟飼養；加上豬棚都分開「分娩舎」、「離乳舎」全部有健康管理流程，豬隻特別健康，減低豬生病互相感染，肉質亦會爽而唔肥膩。
唔係講笑，食咗幾日靚肉，返嚟食番普通豬，真係好明顯覺得有豬羶味，真係一分錢一分貨呢！
【Kei San 小檔案】
日本北海道出生。居港超過三十年，能操流利廣東話，年輕時出國留學，畢業後走訪海外多國工作的關係，練就出獨立自「煮」的好手藝，對食材的選擇也有心得，因此被傳媒發掘，活躍於各大報章雜誌的烹飪示範及美食專題，更有幸參與不少電視節目演出及主持，是料理達人及美食家，日本飲食文化的傳道者。
圖說
1)高橋先生(左)就係白金豚老闆，對飼養豬隻好有心得。
2)唔好以為咁大條肥膏，但灼起後，真係好爽，一D都唔肥。
3)日式洋食，簡單煎豬扒，配自家製果醬，好開胃。
4)豬肉漢堡以為會好硬，佢又做到好鬆軟Juicy，肥瘦適中。 |
您可能有興趣:
|
搜尋新聞
